Та таргалалтаа хэрхэн хэмжих вэ?

Таргалалтыг тодорхойлох хамгийн энгийн арга нь биеийн жингийн индексийг тогтоох юм.

 Биеийн жингийн индекс (БЖИ). Тухайн хүний биеийн жин, өндрийг харьцуулж, биед агуулагдах өөхлөг эдийн хэмжээг тогтооход БЖИ-ийг ашигладаг. Гэхдээ БЖИ-ийн үзүүлэлтээр биед агуулагдах өөхлөг эдийн байрлалыг тогтоох боломжгүй юм.Биеийн жин, өндрийг хэмжин дараах томъёог ашиглан БЖИ-ийг хялбархан тооцох боломжтой. БЖИ-ийг олохдоо биеийн жин, өндрийг үнэн зөв, нягт нямбай тодорхойлох шаардлагатай. Тухайн хүний килограммаар илэрхийлсэн биеийн жингийн утгыг метрээр илэрхийлсэн өндрийн квадрат утгад харьцуулж олно.

 БЖИ = Биеийн жин (Кг) : Биеийн өндөр (М2)

Жишээ 1: Биеийн өндөр - 150 см буюу 1.5 метр, Жин нь 54.6 кг хүний БЖИ-ийг тооцон олцгооё.

БЖИ = 54.6 : (1.5 х 1.5) = 54.6 : 2.25 = 24.26               Хэвийн жинтэй

Жишээ 2: Биеийн өндөр – 163.7 см буюу 1.64 метр, Жин нь 76.8 кг хүний БЖИ-ийг тооцон олцгооё.

БЖИ = 76.8 : (1.64 х 1.64) = 76.8 : 2.68 = 28.5                Илүүдэл жинтэй

Жингээ үзэх

     

Биеийн жингийн тоон үзүүлэлт ба үнэлгээ

18.5-аас доош кг-Тураалтай

18.5-24.9 кг-Хэвийн

25-29.9 кг-Таргалалтын нэгдүгээр зэрэгтэй

30-39.9 кг-Таргалалтын хоёрдугаар зэрэгтэй

40-өөс дээш кг-Хэт таргалалттай

БЖИ-ээ тодорхойлохдоо:

•  Баталгаатай жин хэрэглэ
• Баталгаатай өндөр хэмжигч ашигла
•  Жингээ өглөө босоод бие зассаны дараа, эсвэл хоол цайны өмнө болон хэрэглэснээс хойш 2-3 цагийн дараа хэмжинэ.

Бүсэлхийн тойрог: Энэ хэмжигдэхүүн нь хүний их биеийн арьсан дор хуримтлагдсан өөхлөг эдийн хэмжээг тогтоож, төвийн таргалалтыг илрүүлэх ач холбогдолтой.Төвийн таргалалт нь хүний их бие, хэвлий орчимд хуримтлагдсан өөхлөг эдийн хэмжээгээр тодорхойлогдоно.

 Бүсэлхийн тойргийг хэмжихэд:

• Эрэгтэйчүүдэд 90 см-ээс бага
• Эмэгтэйчүүдэд 80 см-ээс бага

Дээрх хязгаараас ихэссэн тохиолдолд тухайн хүний БЖИ хэвийн байсан ч төвийн таргалалттай буюу халдварт бус өвчин, тухайлбал зүрх судасны өвчин, чихрийн шижин, хорт хавдраар өвчлөх эрсдэлтэй гэж үзнэ.

Та хэрхэн жингээ хэвийн хэмжээнд барьж байх вэ?

Жингээ барих хоёр зарчим

•  Илчлэгийн хяналт: Жингээ хасах хүмүүс хэвийн хэмжээнээс бага илчлэгтэй хүнс хэрэглэх ёстой.
•  Дасгал хөдөлгөөн: Өөрийн ердийн хөдөлгөөнөөс илүү хурдан хэмнэлттэй дасгалыг өдөр бүр 30 минутаас доошгүй хугацаанд хийх хэрэгтэй.

Жингээ хэвийн хэмжээнд барьж байхын тулд та өөрийн нас, хүйс, эрхэлж буй ажил хөдөлмөрт тохирсон илчлэг бүхий хоол хүнс хэрэглэх шаардлагатай. Үүний тулд хоногт шаардагдах илчлэгээ мэдэх хэрэгтэй.